तस्वीर में नवोदिता घाटगे कागल में बैंक की वार्षिक सभा में पोडियम से भाषण दे रही हैं।

राजे विक्रमसिंह घाटगे बँकेच्या गत आर्थिक वर्षात ठेवींमध्ये ४० कोटी रुपयांहून अधिक वाढ झाली असून, बँकेकडे सातत्याने वाढणाऱ्या ठेवी या सभासद व ग्राहकांच्या बँकेवरील दृढ विश्वासाचे प्रतीक आहेत, असे प्रतिपादन बँकेच्या अध्यक्षा सौ. नवोदिता घाटगे यांनी केले. कागल येथील श्रीराम मंदिरातील सभागृहात शतक महोत्सवी राजे विक्रमसिंह घाटगे बँकेची १०९ वी वार्षिक सर्वसाधारण सभा खेळीमेळीत पार पडली. यावेळी अध्यक्षस्थानावरून त्या बोलत होत्या.

सौ. नवोदिता घाटगे म्हणाल्या की, राजे बँक लवकरच एक हजार कोटी रुपयांच्या व्यवसायाचा टप्पा पार करण्याच्या दिशेने वाटचाल करीत आहे. बाजारातील अस्थिर परिस्थिती असतानाही बँकेला ७ कोटी ४४ लाख रुपयांचा उच्चांकी ढोबळ नफा झाला आहे. अन्य तरतुदी वजा करून सभासदांना १५ टक्के लाभांश देण्यात येणार असल्याची घोषणाही त्यांनी यावेळी केली.

शाहू उद्योग समूहाचे अध्यक्ष राजे समरजितसिंह घाटगे यांनी सांगितले की, राजे बँकेला कोल्हापूर जिल्ह्यासह महाराष्ट्रातील अन्य जिल्ह्यांमध्ये कार्यक्षेत्र विस्तारून शाखा व व्यवसायवाढीसाठी मोठी संधी आहे. त्या दृष्टीने भविष्यात बँकेने नियोजनबद्ध प्रयत्न करणे आवश्यक आहे. सहकार महर्षी दिवंगत राजे विक्रमसिंह घाटगे यांचे राजे बँकेने शेड्युल्ड बँकेचा दर्जा प्राप्त करावा, हे स्वप्न होते. हे स्वप्न पूर्ण करण्यासाठी बँकेने पुढील काळात प्रयत्न करावेत, असे आवाहन त्यांनी केले.

डिजिटल बँकिंगचा वापर वाढत असताना सायबर फसवणुकीचे प्रकारही वाढत आहेत. त्यामुळे डिजिटल व्यवहार करताना सर्वांनी विशेष खबरदारी घेणे अत्यंत आवश्यक आहे, असे आवाहन सौ. नवोदिता घाटगे यांनी केले.

आपला OTP, ATM PIN, UPI PIN, CVV, पासवर्ड किंवा बँकिंगशी संबंधित गोपनीय माहिती कोणत्याही व्यक्तीला देऊ नये. अनोळखी व्यक्तींचे फोन, संदेश किंवा लिंक यांना प्रतिसाद देऊ नये. बँक कधीही फोन करून अशा गोपनीय माहितीची मागणी करत नाही, हे सर्वांनी लक्षात ठेवावे. सावधानता हीच सायबर फसवणुकीपासूनची पहिली सुरक्षा आहे. आपण स्वतः जागरूक राहण्याबरोबरच कुटुंबातील इतर सदस्यांनाही सायबर सुरक्षिततेबाबत जागरूक करावे, असेही त्यांनी सांगितले.

सन २०२५-२६ मध्ये उत्कृष्ट कामगिरी करणाऱ्या शाखांना यावेळी पुरस्कार देण्यात आले. प्रथम क्रमांक लक्ष्मीपुरी, कोल्हापूर शाखेने, द्वितीय क्रमांक केनवडे शाखेने, तर तृतीय क्रमांक मुख्य शाखा कागलने मिळविला. उत्तेजनार्थ पुरस्कार मुदाळतिट्टा शाखेला देण्यात आला. आदर्श कर्मचारी म्हणून संभाजी गाडेकर यांचा गौरव करण्यात आला. तसेच दहावी व बारावीतील गुणवंत विद्यार्थी आणि बँकेच्या कर्मचाऱ्यांच्या पाल्यांचा सत्कार करण्यात आला.

सभेचे स्वागत संचालक एम. पी. पाटील यांनी केले. मुख्य कार्यकारी अधिकारी अरुण पाटील यांनी नोटीस वाचन केले. उपाध्यक्ष रवींद्र घोरपडे यांनी श्रद्धांजली वाचन केले. संचालक संजय चौगुले यांनी आभार मानले. यावेळी सर्व संचालक, सभासद तसेच अधिकारी-कर्मचारी मोठ्या संख्येने उपस्थित होते.

कागल येथील या १०९ व्या वार्षिक सर्वसाधारण सभेत वाढत्या ठेवी, एक हजार कोटी रुपयांच्या व्यवसायाचा टप्पा, १५ टक्के लाभांश, बँकेचा भविष्यातील विस्तार आणि सायबर सुरक्षितता या मुद्द्यांवर भर देण्यात आला.

फोटो - कागल : राजे विक्रमसिंह घाटगे बँकेच्या १०९ व्या वार्षिक सर्वसाधारण सभेत मार्गदर्शन करताना अध्यक्षा सौ. नवोदिता घाटगे. यावेळी व्यासपीठावर शाहू उद्योग समूहाचे अध्यक्ष राजे समरजितसिंह घाटगे व अन्य संचालक.

Tags: