नासिक में पाण्यात बुडत असलेल्या मुलाला वाचवण्यासाठी गेलेल्या वडिलांचा पाण्याच्या जोरदार प्रवाहात वाहून जाऊन मृत्यू झाला. त्यानंतर बेपत्ता असलेल्या 14 वर्षीय मुलाचाही मृतदेह दुसऱ्या दिवशी सापडला. पहिने बारी ते वाडीवऱ्हे रस्त्यालगत असलेल्या पाण्याच्या डोहात ही दुर्घटना घडली. या घटनेने सिडको परिसरात हळहळ व्यक्त केली जात आहे.

मिळालेल्या माहितीनुसार, सिडकोतील सावतानगर, अक्षय चौक परिसरात राहणारे संजय धोंडू सोनवणे (वय 48) हे रिअल इस्टेट व्यवसायात कार्यरत होते. गुरुवारी गणेश विसर्जनाच्या पूर्वसंध्येला ते त्यांचा 14 वर्षीय मुलगा श्री सोनवणे आणि काही सहकाऱ्यांसोबत फिरण्यासाठी गेले होते.

जेवण झाल्यानंतर ते पहिने बारी ते वाडीवऱ्हे रस्त्यालगत असलेल्या पाण्याच्या डोहाजवळ थांबले. संजय सोनवणे यांना पोहता येत असल्याने ते पाण्यात उतरून पोहत होते. वडील पोहत असल्याचे पाहून मुलगा श्री यानेही पाण्यात उतरण्याचा प्रयत्न केला.

काही वेळातच श्री पाण्यात बुडू लागला. मुलगा बुडत असल्याचे लक्षात येताच संजय सोनवणे यांनी त्याला वाचवण्यासाठी तातडीने धाव घेतली. मात्र, डोहातील पाण्याचा प्रवाह जोरदार असल्याने मुलाला वाचवण्याच्या प्रयत्नात संजय सोनवणे हे स्वतःही प्रवाहासोबत वाहून गेले.

घटनेची माहिती मिळताच वाडीवऱ्हे पोलिस आणि बचाव पथक घटनास्थळी दाखल झाले. बचावकार्य सुरू करण्यात आले. संजय सोनवणे यांचा मृतदेह पाण्याबाहेर काढण्यात आला. त्यानंतर बेपत्ता असलेल्या श्री सोनवणे याचा शोध सुरू होता. दरम्यान, दुसऱ्या दिवशी श्री सोनवणे याचाही मृतदेह सापडला.

या प्रकरणी वाडीवऱ्हे पोलिस ठाण्यात नोंद करण्यात आली असून पुढील तपास सुरू आहे. गणेश विसर्जनाच्या आदल्या दिवशी घडलेल्या या दुर्घटनेमुळे सोनवणे कुटुंबावर दुःखाचा डोंगर कोसळला असून सिडको परिसरात हळहळ व्यक्त केली जात आहे.

Tags: