कोल्हापूर : विजय मोरबाळे

२३ वर्षांखालील जागतिक अजिंक्यपद कुस्ती स्पर्धेचे स्वप्न घेऊन अमेरिकेला जाणाऱ्या मुरगूडच्या कुस्तीपटू अमृता पुजारी हिच्या आंतरराष्ट्रीय मोहिमेला माजी मंत्री आमदार सतेज उर्फ बंटी पाटील यांनी आर्थिक मदतीचा हात दिला आहे. अमृताची निवड झाल्याबद्दल जाहीर केलेली ५० हजार रुपयांची बक्षीस रक्कम त्यांनी तातडीने सुपूर्द केली.

२३ वर्षांखालील जागतिक अजिंक्यपद कुस्ती स्पर्धेसाठी अमृताची निवड झाल्याबद्दल ६ सप्टेंबर रोजी सतेज पाटील यांच्या हस्ते तिचा सन्मान करण्यात आला होता. यावेळी त्यांनी अमृताला ५० हजार रुपयांचे बक्षीस जाहीर केले होते. जाहीर केलेली रक्कम तातडीने देत त्यांनी ‘बोले तैसा चाले, त्यांची वंदावी पाऊले’ याची प्रचिती दिली.

मंडलिक कुस्ती संकुलात झालेल्या कार्यक्रमात माजी नगरसेवक राजेंद्र साबळे व युवक काँग्रेसचे जिल्हाध्यक्ष वैभव ताशिलदार यांच्या हस्ते अमृताला बक्षीस रक्कम सुपूर्द करण्यात आली. यावेळी मुरगूड नगरीचे माजी नगराध्यक्ष नामदेवराव मेंडके, जयसिंग भोसले, नगरसेवक दत्तात्रय मंडलिक, दीपक शिंदे, नगरसेवक एस. व्ही. चौगुले, राजू कांबळे, अंगज मॅडम, शिंदे मॅडम आणि पत्रकार सुनील डेळेकर आदी उपस्थित होते.

तसेच आंतरराष्ट्रीय कुस्ती मार्गदर्शक दादासो लवटे, NIS कुस्ती प्रशिक्षक दयानंद खतकर, महिला NIS कुस्ती प्रशिक्षक नंदिनी साळोखे आणि उपमहाराष्ट्र केसरी रोहन रंडे यांचीही उपस्थिती होती.

यावेळी बोलताना दादासो लवटे म्हणाले, “सतेज उर्फ बंटी पाटील यांची ही मदत अमृताला जागतिक स्तरावर कोल्हापूरचे नाव चमकविण्यासाठी निश्चितच प्रेरणा देईल.”

अमृताच्या आंतरराष्ट्रीय मोहिमेसाठी मिळालेल्या ५० हजार रुपयांच्या या मदतीमुळे तिच्या क्रीडा प्रवासाला नवी ऊर्जा मिळाली आहे. अमेरिकेत होणाऱ्या २३ वर्षांखालील जागतिक अजिंक्यपद कुस्ती स्पर्धेसाठी रवाना होणाऱ्या अमृताला यावेळी मान्यवरांनी शुभेच्छा दिल्या.

फोटो : मंडलिक कुस्ती संकुलात जागतिक अजिंक्यपद स्पर्धेसाठी अमेरिकेला जाणाऱ्या अमृता पुजारीला ५० हजार रुपयांची बक्षीस रक्कम सुपूर्द करताना मान्यवर.

Tags: