मुरगुड में आयोजित कार्यक्रम के दौरान एक-दूसरे को गुलाब का फूल भेंट करते वरिष्ठ नागरिक।

ज्येष्ठ नागरिकांसाठी विविध उपक्रम प्रभावीपणे राबविणाऱ्या मुरगूड शहर ज्येष्ठ नागरिक संघाच्या कार्याचे मंडलिक महाविद्यालयाचे माजी प्राचार्य डॉ. जयंत कळके यांनी कौतुक केले. ज्येष्ठ नागरिक संघाचे कार्य आदर्शवत असल्याचे गौरवोद्गार त्यांनी काढले.

मुरगूड शहर ज्येष्ठ नागरिक संघाच्या वतीने ३५ वा जागतिक ज्येष्ठ नागरिक दिन उत्साहात साजरा करण्यात आला. यानिमित्त संघातील ७५ वर्षांवरील ज्येष्ठ सदस्यांचा सत्कार करून त्यांना वाढदिवसाच्या शुभेच्छा देण्यात आल्या. तसेच आयुष्मान वयो वंदना कार्ड व ओळखपत्रांचे वितरण करण्यात आले.

कार्यक्रमाच्या अध्यक्षस्थानी दलितमित्र डी. डी. चौगले होते. यावेळी माजी प्राचार्य डॉ. जयंत कळके, गजाननराव गंगापुरे, पी. डी. मगदूम, सखाराम सावर्डेकर, शिवाजी सातवेकर आदी प्रमुख उपस्थित होते. मान्यवरांच्या हस्ते दीपप्रज्वलन करून कार्यक्रमाची सुरुवात करण्यात आली.

यावेळी बोलताना डॉ. जयंत कळके म्हणाले, “ज्येष्ठांनी आपल्या आरोग्याची विशेष काळजी घेतली पाहिजे. शारीरिक व्यसनांपासून जितके दूर राहता येईल, तितके ज्येष्ठ नागरिकांसाठी हितकारक आहे. प्रभुत्ववादाची भूमिका सोडून नव्या पिढीशी सकारात्मक दृष्टिकोनातून वागल्यास संघर्ष टळून जीवन अधिक सुखकर होईल. या वयात ज्येष्ठांना सहवास आणि सहकार्याची गरज असते.”

दलितमित्र डी. डी. चौगले म्हणाले, “आई-वडिलांची सेवा करणे हे काही जणांना चुकीचे किंवा ओझे वाटते. त्यामुळेच अनेक ज्येष्ठ नागरिक समाधान आणि आपलेपणा मिळविण्यासाठी ज्येष्ठ नागरिक संघात येतात.”

यावेळी ज्येष्ठ नागरिक संघाचे संचालक अशोक डवरी, एम. टी. सामंत, किशोरकुमार पाटील, रंगराव चौगले, तुकाराम भारमल, शिवाजी कांबळे, सिकंदर जमादार, सदाशिव एकल, महादेव वागवेकर, महादेव कानकेकर यांच्यासह ज्येष्ठ नागरिक मोठ्या संख्येने उपस्थित होते.

स्वागत संचालक जयवंत हावळ यांनी केले. पाहुण्यांची ओळख संघाचे उपाध्यक्ष पी. डी. मगदूम यांनी करून दिली. प्रास्ताविक संघाचे अध्यक्ष गजाननराव गंगापुरे यांनी केले. सूत्रसंचालन कोजिमाशी संचालक अविनाश चौगले यांनी केले, तर सखाराम सावर्डेकर यांनी आभार मानले.

Tags: