सिंहस्थ महाकुंभ गणेश मंडळ स्पर्धेला प्रतिसाद, 42 मंडळांचे अर्ज दाखल

सिंहस्थ महाकुंभ मेळा 2027च्या जनजागृतीसाठी नाशिक-त्र्यंबकेश्वर कुंभमेळा प्राधिकरणाने आयोजित केलेल्या ‘सिंहस्थ महाकुंभ गणेश मंडळ स्पर्धेला’ गणेश मंडळांचा उत्स्फूर्त प्रतिसाद मिळाला आहे. 17 सप्टेंबर रोजी सायंकाळी पाच वाजेपर्यंत 42 गणेश मंडळांनी स्पर्धेसाठी अर्ज दाखल केले. अधिकाधिक मंडळांना सहभागी करून घेण्यासाठी नोंदणीची मुदत 17 सप्टेंबरपर्यंत ठेवण्यात आली होती.

स्पर्धेसाठी अर्ज प्राप्त झाल्यानंतर सहभागी गणेश मंडळांच्या देखाव्यांची आणि विविध उपक्रमांची प्रत्यक्ष पाहणी करण्यात येणार आहे. यासाठी नऊ सदस्यीय तांत्रिक समिती स्थापन करण्यात आली आहे. प्राधिकरणाचे अतिरिक्त आयुक्त कमलाकर रणदिवे समितीचे अध्यक्ष असून, प्राधिकरणाचे उपजिल्हाधिकारी योगेश चंद्रे समितीचे सदस्य सचिव आहेत.

तांत्रिक समितीकडून गणेश मंडळांनी साकारलेल्या देखाव्यांची, जनजागृती उपक्रमांची तसेच सामाजिक आणि पर्यावरणपूरक उपक्रमांची प्रत्यक्ष पाहणी केली जाणार आहे. स्पर्धेसाठी निश्चित केलेल्या निकषांनुसार मंडळांचे मूल्यमापन होईल. सिंहस्थ महाकुंभच्या संकल्पनेशी सुसंगतता, सर्जनशीलता, नागरिकांचा सहभाग, अंमलबजावणीची गुणवत्ता आणि शाश्वतता या प्रमुख निकषांचा विचार केला जाणार आहे.

गणेशोत्सवातील व्यापक लोकसहभागाच्या माध्यमातून सिंहस्थ महाकुंभ मेळ्याचे आध्यात्मिक आणि सांस्कृतिक महत्त्व, नाशिक-त्र्यंबकेश्वरचा वारसा, पर्यावरणपूरक आणि शाश्वत कुंभ, तंत्रज्ञानाचा वापर तसेच भाविकसेवा याबाबत जनजागृती करणे हा स्पर्धेचा उद्देश आहे.

स्पर्धेत पाच प्रमुख प्रवर्ग ठेवण्यात आले आहेत. प्रत्येक प्रवर्गातील विजेत्या गणेश मंडळाला एक लाख रुपयांचे पारितोषिक देण्यात येणार आहे. याशिवाय नावीन्यपूर्ण आणि विशेष संकल्पनेसाठी दोन लाख रुपयांचे विशेष पारितोषिक दिले जाणार आहे.

सिंहस्थ महाकुंभच्या जनजागृती उपक्रमाशी अधिकाधिक गणेश मंडळांना जोडण्यासाठी प्राधिकरणाने स्पर्धेच्या नोंदणीची मुदत यापूर्वी 10 सप्टेंबरवरून 17 सप्टेंबरपर्यंत वाढविली होती. त्यामुळे 17 सप्टेंबर अखेरपर्यंत प्राप्त झालेल्या अर्जांची संख्या आणखी वाढण्याची शक्यता आहे. गणेशोत्सवाच्या माध्यमातून सिंहस्थ महाकुंभ मेळा 2027च्या जनजागृतीला व्यापक लोकसहभाग जोडण्याच्या उद्देशाने ही स्पर्धा आयोजित करण्यात आली आहे.