कोल्हापूर: म्हाकवेत 'लव्ह जिहाद'च्या आरोपावरून मोठा तणाव, आंदोलनानंतर तरुणी पालकांच्या स्वाधीन
कोल्हापूरच्या म्हाकवे गावात 'लव्ह जिहाद'च्या आरोपावरून निर्माण झालेला तणाव कसा निवळला? आंदोलनानंतर तरुणी पालकांच्या स्वाधीन झाली असली तरी गावकरी आता कोणत्या कठोर कारवाईची मागणी करत आहेत? जाणून घ्या या प्रकरणाचा संपूर्ण घटनाक्रम.
कोल्हापूरमधील कागल पोलीस ठाण्यासमोर म्हाकवे गावातील ग्रामस्थ आणि उपस्थित नागरिक आंदोलन करत असतानाचे दृश्य.
कोल्हापूर जिल्ह्यातील कागल तालुक्यातील म्हाकवे गावात एका सज्ञान तरुणीच्या आंतरधर्मीय संबंधांच्या प्रकरणावरून शनिवारी तणावाचे वातावरण निर्माण झाले. या प्रकरणाला काही ग्रामस्थांनी 'लव्ह जिहाद'चे स्वरूप असल्याचा आरोप केला. शेकडो महिला आणि ग्रामस्थांनी आक्रमक पवित्रा घेत मंत्री हसन मुश्रीफ यांच्या निवासस्थानी धाव घेतली आणि तरुणीला तिच्या पालकांच्या ताब्यात देण्याची मागणी केली. ग्रामस्थांचे निवेदन ऐकून मंत्री हसन मुश्रीफ यांनी कागल पोलीस ठाण्याचे निरीक्षक अजित जाधव यांच्याशी संपर्क साधून कायदेशीर प्रक्रिया पूर्ण करत योग्य कारवाई करण्याच्या सूचना दिल्या. त्यानंतर संतप्त आंदोलनकर्त्यांनी कागल पोलीस ठाण्याच्या आवारात ठिय्या आंदोलन सुरू केले.
पोलीस ठाण्यात तरुणी आणि तिच्या पालकांचे समुपदेशन करण्यात आले. यावेळी गोकुळचे संचालक अंबरीश घाटगे यांनी ग्रामस्थांना शांततेचे आवाहन करत हा प्रश्न कायदेशीर मार्गाने सोडवण्यावर भर दिला. अखेर दुपारी एक वाजण्याच्या सुमारास संबंधित तरुणीला पालकांच्या स्वाधीन करण्यात आले, त्यानंतर ग्रामस्थांनी आंदोलन मागे घेतले. या आंदोलनात युवा नेते नाविद मुश्रीफ, शिवसेना (उबाठा)चे विजय देवणे, अंबरीश घाटगे आणि वीरेंद्र मंडलिक यांच्यासह विविध पक्षांचे पदाधिकारी आणि शेकडो नागरिक सहभागी झाले होते. तसेच माजी जिल्हा परिषद सदस्य शिवानंद माळी, माजी पंचायत समिती सदस्य ए. वाय. पाटील आणि माजी सरपंच वर्षा पाटील हे देखील उपस्थित होते.
या प्रकरणावर माहिती देताना डीवायएसपी आप्पासाहेब पवार यांनी सांगितले की, गुरुवारी संबंधित सज्ञान तरुणी आणि तिचा मित्र वकिलांसह पोलीस ठाण्यात आले होते आणि त्यांनी एकत्र राहण्याची इच्छा व्यक्त केली होती. त्यानंतर तरुणीचे समुपदेशन करून तिला कोल्हापूर येथील निरीक्षणगृहात ठेवण्यात आले होते. पालकांच्या विनंतीनंतर पुन्हा समुपदेशन केल्यावर तिने पालकांसोबत जाण्याची तयारी दर्शविल्याने तिचा ताबा त्यांना देण्यात आला. भविष्यात तरुणीकडून कोणतीही तक्रार प्राप्त झाल्यास कायद्यानुसार कारवाई केली जाईल, असे त्यांनी स्पष्ट केले. दरम्यान, विजय देवणे यांनी संबंधित तरुणावर मोक्का कायद्यांतर्गत कारवाई करून त्याला तडीपार करण्याची मागणी केली. माजी जिल्हा परिषद सदस्य शिवानंद माळी यांनी या प्रकरणात सर्व राजकीय गट एकत्र असल्याचे नमूद केले, तर माजी सरपंच वर्षा पाटील यांनी तरुणाच्या आरोपांची सखोल चौकशी व्हावी अशी मागणी केली.
