अदानींना फारच मोठा दिलासा!

नवी दिल्ली, दि. २६ (वृत्तसंस्था) : अमेरिकन रिसर्च फर्म हिंडेनबर्गच्या अहवालानंतर (Hindenburg Research) अदानी (Adani) समूहाला मोठा धक्का बसला आहे. अदानीच्या शेअरच्या किमतीत सातत्याने घसरण सुरू आहे. २४ जानेवारीला हिंडेनबर्ग यांनी अदानी समूहाबाबत आपला अहवाल दिला, त्यानंतर सातत्याने अदानी समूहाला धक्के बसत आहेत. अदानी या संकटाला तोंड देत असतानाच एक दिलासादायक बातमी आहे. अदानींसाठी ती गुड न्यूज आहे. जागतिक रेटिंग एजन्सी S&P ने अदानी ग्रुपला दिलासा देत अदानी ग्रीनला मॉनिटरिंगमधून काढून टाकले आहे. अदानी ग्रीनला केवळ देखरेखीतून वगळण्यात आले नाही, तर त्याचे BB + रेटिंग देखील कायम ठेवले आहे.

यूएस क्रेडिट रेटिंग एजन्सी S&P ने अदानी ग्रीन एनर्जीवर BB + रेटिंग कायम ठेवले आहे. या दिलासादायक बातमीनंतर गुंतवणूकदारांचा आत्मविश्वास वाढणार आहे. रेटिंग एजन्सीने डिसेंबर २०२२ मध्ये अदानी ग्रीन एनर्जीला निकष निरीक्षणाखाली ठेवले होते. एजन्सीने कंपनीला आता या यादीतून वगळले आहे.

अदानी ग्रीनचा आढावा पूर्ण झाला आहे. अदानी ग्रीन एनर्जी लिमिटेड ARGR ची डेट पूर्णपणे सुरक्षित आहे. रेटिंग एजन्सीनुसार, अदानी ग्रीनचे तीन ऑपरेटिंग युनिट्स वर्घा सोलर, कोइंगल सोलर आणि अदानी रिन्युएबल हे आहेत.

अदानी ग्रीनचे युनिट्स $३६२.५ दशलक्ष वरिष्ठ सुरक्षित निश्चित दर २० वर्षीय रोख्यांचे सह- जारीदार आणि सह- जामीनदार आहेत. सातत्याने घसरणीचा सामना करणाऱ्या या कंपनीसाठी हा अहवाल संजीवनीपेक्षा कमी नाही. अदानीच्या गुंतवणूकदारांचा विश्वास परत येईल, असे यावरून म्हटले जात आहे.